1 Tani, Sarai gruaja e Abramit nuk i lindte fëmijë atij; dhe ajo kishte një shërbëtore, një egjiptiane, emri i së cilës ishte Hagar.
2 Dhe Sarai i tha Abramit: Ja tani, ZOTI më ka ndaluar mua për të lindur fëmijë; unë të lutem ty, hyr te shërbëtorja ime; mund të ndodhë që unë të fitoj fëmijë prej saj. Dhe Abrami e dëgjoi zërin e Sarait.
3 Dhe Sarai gruaja e Abramit e mori Hagarën shërbëtoren e saj egjiptiane, pasi Abrami kishte banuar dhjetë vjet në tokën e Kanaanit, dhe ia dha atë burrit të saj Abramit të jetë gruaja e tij.
4 Dhe ai hyri te Hagara, dhe ajo u ngjiz; dhe kur pa që ishte ngjizur, ajo e shihte me përbuzje zonjën e saj.
5 Sarai i tha Abramit: Qoftë mbi ty gabimi im; unë të kam dhënë shërbëtoren time në gjirin tënd; dhe kur pa që ishte ngjizur, ajo më shihte me përbuzje; ZOTI gjykoftë midis meje dhe teje.
6 Por Abrami i tha Sarait: Ja, shërbëtorja jote është në dorën tënde; bëj me të siç të pëlqen. Dhe pasi Sarai e trajtoi ashpër, ajo u largua nga fytyra e saj.
7 Dhe engjëlli i ZOTIT e gjeti atë pranë një burimi të ujit në shkretëtirë, pranë burimit në rrugën për në Shur.
8 Dhe ai tha: Hagar, shërbëtorja e Sarait, nga ke ardhur? Dhe ku do të shkosh? Dhe ajo tha: Unë po largohem nga fytyra e zonjës sime Sarai.
9 Dhe engjëlli i ZOTIT i tha asaj: Kthehu te zonja jote, dhe nënshtroje veten nën duart e saj.
10 Dhe engjëlli i ZOTIT i tha asaj: Unë do ta shumoj farën tënde jashtë mase, që ajo nuk do të numërohet për shkak të morisë.
11 Dhe engjëlli i ZOTIT i tha asaj: Ja, ti je me barrë, dhe do të lindësh një djalë, dhe do t’ia vësh emrin Ishmael; për shkak se Zoti ka dëgjuar mundimin tënd.
12 Dhe ai do të jetë një njeri i egër; dora e tij do të jetë kundër çdo njeriu, dhe dora e çdo njeriu kundër tij; dhe do të banojë në prani të të gjithë vëllezërve të tij.
13 Dhe ajo e quajti emrin e ZOTIT që i foli asaj: Ti Perëndi më shikon mua; sepse ajo tha: A e kam kërkuar edhe këtu atë që më shikon mua?
14 Prandaj pusi u quajt Beerlahairoi; ja, gjendet midis Kadeshit dhe Beredit.
15 Dhe Hagara i lindi një djalë Abramit; dhe Abrami e quajti emrin e djalit të tij, që Hagara lindi, Ishmael.
16 Dhe Abrami ishte tetëdhjetë e gjashtë vjeç, kur Hagara i lindi Abramit Ishmaelin.