1 Dhe ZOTI i tha Noes: Hyr ti dhe gjithë familja jote në arkë; sepse unë ty të kam parë të drejtë para meje në këtë brez.
2 Nga çdo kafshë e pastër do të marrësh me vete nga shtatë, mashkullin dhe femrën e tij; dhe nga kafshët që nuk janë të pastra nga dy, mashkullin dhe femrën e tij.
3 Edhe nga shpendët e ajrit nga shtatë, mashkullin dhe femrën; për të ruajtur të gjallë farën mbi gjithë faqen e dheut.
4 Sepse ka akoma shtatë ditë, dhe do të bëj që të bjerë shi mbi tokë dyzetë ditë dhe dyzetë netë; dhe çdo gjë e gjallë që kam bërë, unë do ta shuaj nga faqja e dheut.
5 Dhe Noeja bëri sipas të gjithave që ZOTI e urdhëroi.
6 Dhe Noeja ishte gjashtëqind vjeç kur përmbytja e ujërave u bë mbi tokë.
7 Dhe Noeja, dhe bijtë e tij, dhe gruaja e tij, dhe gratë e bijve të tij, hynë në arkë, për shkak të ujërave të përmbytjes.
8 Nga kafshët e pastra, dhe nga kafshët që nuk janë të pastra, dhe nga shpendët, dhe nga çdo gjë që zvarritet mbi tokë,
9 Hynë dy nga dy në arkë te Noeja, mashkulli dhe femra, siç e kishte urdhëruar Perëndia Noen.
10 Dhe pas shtatë ditësh ndodhi, që ujërat e përmbytjes u gjendën mbi tokë.
11 Në vitin e gjashtëqindtë të jetës së Noes, në muajin e dytë, ditën e shtatëmbëdhjetë të muajit, po atë ditë shpërthyen gjithë burimet e humnerës së madhe, dhe dritaret e qiellit u hapën.
12 Dhe ra shi mbi tokë dyzetë ditë e dyzetë netë.
13 Në po atë ditë hynë Noeja, dhe Shemi, dhe Hami, dhe Jafethi, dhe gruaja e Noes, dhe tri gratë e bijve të tij bashkë me ta, në arkë;
14 Ata, dhe çdo kafshë sipas llojit të vet, dhe gjithë bagëtia sipas llojit të tyre, dhe çdo gjë rrëshqanore që zvarritet mbi tokë sipas llojit të vet, dhe çdo shpend sipas llojit të vet, çdo zog i çfarëdolloji.
15 Dhe ata hynë te Noeja në arkë, dy nga dy prej çdo mishi, në të cilin ishte fryma e jetës.
16 Dhe ata që hynë, hynë mashkull e femër nga çdo mish, siç kishte urdhëruar Perëndia; dhe ZOTI e mbylli atë brenda.
17 Dhe përmbytja u bë dyzetë ditë mbi tokë; dhe ujërat u rritën, dhe e ngritën arkën, dhe ajo u ngrit lart mbi tokë.
18 Dhe ujërat kapërcyen, dhe u shtuan shumë mbi tokë; dhe arka shkoi mbi sipërfaqen e ujërave.
19 Dhe ujërat kapërcyen jashtë mase mbi tokë; dhe gjithë malet e lartë, që ishin poshtë gjithë qiellit, u mbuluan.
20 Ujërat kapërcyen pesëmbëdhjetë kubitë sipër; dhe malet u mbuluan.
21 Dhe i gjithë mishi që lëvizte mbi tokë vdiq, si prej shpendëve, dhe prej bagëtive, dhe prej kafshëve, dhe prej çdo gjëje rrëshqanore që zvarritet mbi tokë, dhe çdo njeri;
22 Të gjithë ata që kishin frymën e jetës në vrimat e hundës, prej të gjithëve që ishin mbi tokën e thatë, vdiqën.
23 Dhe çdo gjë e gjallë u shua që ishte mbi faqen e dheut, si njeriu, dhe bagëtia, dhe gjërat rrëshqanore, dhe shpendët e qiellit; dhe ata u shuan nga toka; dhe Noeja vetëm mbeti gjallë, dhe ata që ishin bashkë me të në arkë.
24 Dhe ujërat kapërcyen mbi tokën njëqind e pesëdhjetë ditë.