1 Korintasve 15:58

“Prandaj, vëllezërit e mi të dashur, jini të palëkundur, të patundur, rritni gjithmonë punën e Zotit, meqë ju e dini se puna juaj nuk është më kot në Zotin.”
- 1 Korintasve 15:58

​     Puna e Perëndisë nuk është vetëm për pastorin. Pa tjetër, ai është kujdestari i kishës, por puna e Perëndisë është për çdo besimtar, për çdo njeri që ka pjesë në familjen e Zotit. Le të rritemi së bashku në punën e Zotit; domethënë, me besnikëri në shërbesat e kishës, në lutjet, në dhurimet, në studimin e Biblës, duke qenë një dëshmues i mirë i Ungjillit, duke dhënë mësime Biblike. Ne të gjithë jemi shërbëtorë të Zotit, dhe është detyra jonë të punojmë për Atë. Gjithashtu, vargu thotë: “…jini të palëkundur, të patundur…”. Pse? Pse e kemi këtë inkurajim nga Fryma e Zotit? Sepse Ai e di që në jetë problemet do vijnë, stuhitë do vijnë, sprovat do vijnë, tundimet do vijnë. Epshet tona do të shfaqen kur besimi ynë është i dobët, por ne duhet të jemi këmbëngulës në pozicionin tonë në Krishtin. Mos harroni që vargu thotë: “…ju e dini se puna juaj nuk është më kot në Zotin…”. Puna që bëjmë për Zotin nuk është më kot. Domethënë, ajo do të jetë e frytshme, do të na sjellë shumë fitime gjatë jetës në botë edhe në përjetësi. Amin!