Jozueu 22:20

“A nuk bëri një faj Akani, biri i Zerahut në gjënë e mallkuar, dhe zemërimi ra mbi gjithë asamblenë e Izraelit? Dhe nuk vdiq vetëm ai njeri për ligësinë e tij.”
- Jozueu 22:20

     Në këtë varg Jozueu është duke e paralajmëruar popullin e Izraelit për shpagimet e mëkatit. Ai u kujtoi atyre diçka që ndodhi vite më përpara kur Jozueu dhe bijtë e Izraelit sapo kishin hyrë në tokën e premtuar. Në fillim, Zoti u dha atyre një fitore të mrekullueshme në betejën e Jerikos. Atje, ata kishin urdhër nga Zoti të mos preknin ndonjë gjë; domethënë, të shkatërronin çdo gjë. Një njeri që quhej Akan, pas betejës, në rrënojat e Jerikos, pa një rrobë babilonase të bukur, ca argjend dhe një copë flori. Ai i lakmoi këto, dhe duke mos iu bindur urdhërit të Perëndisë, i fshehu në tokë nën çadrën e tij. Pastaj, Izraeli shkoi në betejën e dytë, por atje u mposhtën. Tridhjetë e gjashtë burra izraelitë vdiqën. Jozueu u ankua para Perëndisë për këtë, dhe Perëndia i tha: “Çohu, pse shtrihesh ashtu përmbys? Izraeli ka mëkatuar…”. Kuptimi është: Mos qani! Çohu! Zgjidh problemin! Pastro mëkatin! Vini re që Zoti tha: “Izraeli ka mëkatuar.” Ne do të thoshim që nuk ishte gjithë Izraeli, por vetëm një njeri Akani që mëkatoi, por jo, padrejtësia hyri mes popullit, dhe prandaj ata të gjithë vuajtën për atë. Vargu i sipërm thotë që Akani nuk ishte i vetmi që vdiq për mëkatin e tij. Për shkak të këtij mëkati edhe familja e tij u shkatërrua. Mësimi për sot është: Le të mos mendojmë që vetëm ne, idividualisht, do të vuajmë për mëkatet që bëjmë. Jo! Jo! Jo! Ka edhe njerëz të tjerë që do të vuajnë për mëkatet tona. Le të largojmë çdo padrejtësi dhe mëkat prej nesh! Amin!