Mateu 5:6

“Të bekuar janë ata që kanë uri dhe etje për drejtësi; sepse ata do të ngopen.”
- Mateu 5:6

     A jeni të uritur sot? A keni etje? Jo për ushqim fizik apo pije, por për drejtësinë e Zotit. Nëse po, ju jeni shumë të bekuar sepse Bibla thotë që ata që kanë këto dëshira të forta për Perëndinë, do të ngopen. Ne shpesh presim një fjalë ose një bekim nga Zoti dhe nuk e pranojmë atë. Pse? A mund të jetë për shkak se nuk kemi dëshirë për gjërat e Tij? A mund të jetë që jemi të ngopur me gjërat e botës dhe nuk kemi vend për Zotin, për kishën, për Biblën, për lutje? Zoti na ndihmoftë! Ne kemi dëshira të forta për këto gjëra të përkohshme dhe nuk vlerësojmë gjërat e përjetshme. Vini re që Perëndia ka shtuar këtu një premtim. Ata që kanë etje dhe uri për drejtësi do të ngopen. Nëse dikush e kërkon Perëndinë me gjithë zemër, Ai do të gjendet prej tij. Nëse dikush dëshiron të ecë në rrugët e Tij, Fryma e Shenjtë do t’ia hapë rrugën atij. Nganjëherë, kur vijmë në kishë, më duket si një shërbesë e fjetur, ose e thatë. Pse? Sepse ne duhet të vijmë me etje për Perëndinë, me uri për të dëgjuar Fjalën e Tij. Është mirë kur ne përgatitemi në shtëpi për shërbesën e kishës. Unë e di që provojmë të vishemi mirë, por unë flas për zemrën. Ndoshta, jemi të pastër nga jashtë, por nga brenda jemi të pistë, dhe të ngopur e të kënaqur me gjërat e botës. Zoti na ndihmoftë!