Romakëve 7:12

“Prandaj ligji është i shenjtë, dhe urdhërimi i shenjtë, edhe i drejtë, edhe i mirë.”
- Romakëve 7:12

     Pardje, te kisha në Sarandë, ne predikuam për ligjin e Perëndisë. Nganjëherë, ligji duket si armik për ne. Ligji i Zotit është i shenjtë dhe i përsosur, dhe kur ne ta shikojmë veten tonë në pasqyrën e ligjit të Perëndisë, ne nuk do jemi të kënaqur me veten. Ne do të kuptojmë që nuk jemi të përsosur. Do kuptojmë që krenaria dhe mburrjet tona janë më kot. Nëse zgjohem nesër në mëngjes dhe shikoj veten në pasqyrë, dhe dukem i shëmtuar, nuk është faji i pasqyrës që jam kështu, është faji im. Unë vetë duhet të kujdesem për dukjen time; të qethem, të rruhem, të lahem, t’i laj dhëmbët, të krihem, të vishem me rroba të pastra; domethënë, ta mbaj veten me higjenë të mirë. Pasqyra nuk është armiku im, ajo thjesht më tregon të vërtetën. Ligji i Zotit nuk është armiku ynë, ai ne tregon se kush jemi, dhe si dukemi në sytë e Perëndisë. Kur Isaia, ai profeti i madh e pa veten në pasqyrën e Perëndisë, ai tha: “…I mjerë jam unë! Se jam i humbur…”. Kur Apostulli Pal e pa veten në këtë pasqyrë, ai tha: “Oh, njeri i mjerë që jam! kush do të më shpëtojë mua nga trupi i kësaj vdekjeje?” Nëse këta dy gjigantë për Perëndinë e panë veten kështu, po ne? A jemi ne më mirë se ata? Ligji është i mirë, i drejtë dhe i shenjtë. Mos kini frikë ta shikoni veten në pasqyrën e ligjit të Zotit. Amin!